UMphathiswa WamaPolisa, uSenzo Mchunu, uhleli iveki yonke engenzi nto tu ngeendaba ezingeyonyaniso, nezithetha kakubi ngenqununu yesi sikolo, ezaye zijikeleza ziphindaphindwa kumajelo onxibelelwano loluntu nakumaqumrhu eendaba. Ezi ndaba zabaselwa nazizinto ezingeyonyaniso ezathethwa nguye buqu kwingxelo yamajelo eendaba.

ISetyana Lotshutshiso Lwabucala leAfriForum, elimele inqununu yeKholeji iBergview, uJaco Pieterse, liza kuthi ke ngoku limcebise, limkhokele kanjalo, ukuba abamangalele ngokwaphula umthetho abo baye bahlalela ukuziphindaphinda ukuzithetha ezi zinto zingeyonyaniso.

Inqununu le yahlaziswa kuwonkewonke kuthethwa into engekhoyo kusithiwa yona iye yaphazamisana nophando lwamapolisa olwaluphanda ukudlwengulwa komntwana owayehamba kwesaa sikolo. UMnu. Mchunu wayenalo ulwazi kwanalo negunya lokuba ayicacise eyona nto iyinyaniso, koko wakhetha ukuthi cwaka.

Kufuneka acele uxolo kuPieterse nakuluntu lonke, angxengxeze kubo. "Into yokugwetywa komntu omsulwa egwetywa ngabacuphi bamajelo onxobelelwano loluntu, nangabantu abakwiindawo eziphezulu abazifunela inzuzo yezopolitiko, ayifannelekanga nakanye ukuba ivunyelwe yenzeke, ifuthi igqumelele amazwi abo bangabona banegunya ngokusemthethweni lokusebenza ngokukokulawula komthetho.

Kuba nzima ukuzithethethelela xa kukho isankxwe sezityholo ezingenasihlahla, ezingenalwazi kakuhle lwemeko ekuthethwa ngayo, abe lo ungoyena ufanele ukucacisa inyaniso ethule ethe cwaka," utshilo uMthetheli uGerrie Nel, oyintloko yeSetyana eli, kwileta ayibhalele iofisi yomphathiswa wamapolisa kunye nabaphathi beNkozo Yobupolisa YaseMzantsi Afrika (iSAPS).

Phakathi kwabo bakhonjiweyo ukuba baza kumangalelwa, kukho aba: uMnu. Mchunu; uNobhala Jikelele weANC, uFikile Mbalula; uMphathiswa WeMfundo waseMpuma Koloni, uFundile Gade; kwanenkokeli yeEFF, uJulius Malema. Ukuba iGunya Lesizwe Lezotshutshiso (iNPA) alivumi ukubatshutshisa aba bantu, eli Setyana liza kuqhuba lenze utshutshiso-mthethweni lwabucala.

NgoMgqibelo, umhla we29 KweyoKwindla (kuMatshi), eli Setyana lalikhuphe ingxelo eya kumajelo eendaba, licacisa phandle ukuba "uPieterse akangomrhanelwa kweli tyala lodlwengulo, kanti namapolisa ayegazange akhe athi ungomnye wabarhanelwa yena." Kwathi sekusemva emva kweeyure ezithile, uMnu. Mchnu wakhupha ingxelo awathi kuyo,

"Bathathu abantu abakhonjiweyo njengabarhanelwa. Kubo kukho neNqununu yesikolo esiya. Zonke iingxelo ebezisalindelekile sezide zafika kwiGosa Eliphandayo. Nokuxilongwa kweDNA kuye kwenziwa."

Sekusaziwa ke ngoku nguwonkewonke ukuba uMnu. Mchunu wayethetha into engekhoyo, lo gama iAfriForum yayithetha into ekhoyo. Kodwa ke kuyabonakala ukuba ukuyivuma le nyaniso kwaba yinto enganambithekiyo nje tu ngokobupolitiki kuMphathiswa lo. Wahlala de kwadlula iintsuku ezintandathu zonke uMnu. Mchunu phambi kokuba awenze loo mzamo, nawo oyekeyekana, wokuvuma ukuba umtyhole engenatyala lo kaPieterese.

"Nalapho, zange axele ngokuphandle ukuba ululahlekisile uluntu. Loo nto ke iye yabangela ukuba kukhutshwe enye ingxelo eya kumajelo eendaba, loo ngxelo iphendula izityholo ezi wayenzenze kuwonkewonke ezibubuxoki ezithu uPieterse akavumi ukunika isampuli yokuxilongwa kweDNA yakhe.

Kuthe ngoMvulo umhla we7 kuTshaziimpuzi (kuEpreli), kwaba kukhona usomlomo wabeNkozo Yobupolisa (weSAPS), UBhrigadiya Athlenda Mathe, ayivuma ngokuthe poqo kunomathotholo iRadio 702, into ethi, "inqununu yayingazange ikhe ikhonjwe njengomntu okrokrelekayo kweli tyala eli.

"Ngokweengxelo zemibuzo eyayibuziwe, le nqununu yayikude nesaa sikolo kwezaa ntsuku zintathu okanye zine esigxininisa kuzo." Waqhuba wathi kwakungekho nto ifunisa ukuba kucelwe isampuli yasemlonyeni kuPieterse. UMnu. Nel uthe ukoyisakala kwamapolisa ukuyicacisa eyona nyaniso kuye kwayiphatha kakubi inqununu kunye nabo banxulumene nesikolo esiya.

"Amapolisa anyanzelekile ngokoMgaqosiseko ukuba ajongane nolwaphulomthetho ngezi ndlela: aluthintele, aluphelise kanjalo aluphande. Kufuneka kanjalo ukuba amisele ucwangco kuwonkewonke, akhusele uluntu. AbeNkonzo YobuPolisa (iSAPS) kunye neofisi yoMphathiswa WamaPolisa baye boyisakala kukuyenza yomibini le misebenzi inyanzelekileyo.

"Oku koyisakala kwakunye nesankxwe esingenabunyaniso sokuzama ukutyibeka umntu ngetyala, izinto ezo ezenziwe nayiOfisi yoMphathiswa WamaPolisa, kuvele kwabuphithizelisa ubomi bomntu omsulwa, kwamenza ukuba abe phantsi kwemeko embi yokuba athi engenzanga nto, abe semnciphekweni omkhulu, osondele nasekufeni.

"IKholeji iBergview, nabasebenzi bayo, nabafundi bakhona, kunye nabazali babo baye baba ngamaxhoba okuchatshazelwa liphulo lokungcolisa igama lomntu, iphulo ke ebelinako ukunqandwa kodwa alanqandwa.

"Ayisayi kubuya ngamva ke imizamo yethu yokuqinisekisa ukuba bayivune into abaye bayihlwayela abo bathetha bahlazise igama lomntu omsulwa, besenzela inzuzo kwezopolitiko," uqukumbele ngelitshoyo uMnu. Nel.